بحب السلط ... قصيدة للأخ أحمد الحاج محمود الحياري

بحب السلط .. ونسمتها

وطهر قبورنا اللي بعيزريتها

أشم تراب قلعتها

وبالجادور يسمينات للمنشية فوحتها

إذا شتت وسال السيل

من طلعة سوادا ومن طرق الكراد والصافح

وأم زيتونة وادي الشجرة والنقب اللي بالدبور

من الجدعة على الدراج تتسحسح على ميعاد

كلها رايحة تدلك لوين تروح على حزير اخو يوسف

وطلعة شمس ثاني يوم هفهف من صفاها الطف

للميدان ووادي شعيب نسمتها

بحب السلط وخضرتها

وخبيزة بطريق الواد مدت إيدها تصافح بورقتها

وسلة تين سبع انواع في القرآن لما يقول لك " والتين "

حدعشر ألف عام التين عاش بهالبلد

واسأل عن الجلجال وقصتها

خضاري حماري وسوادي

سماوي عسالي وموازي

بياضي وعد هالانواع قشر ولا ما قشرت

ما بيه طقش ولا بيه عجر ولا هو فج

ولا بيه دود ولا محسود هاي التينة بركتها

إذا في آب فت السلط محلا التين والديفور وشجرة تين وظلتها

إلك قطف العنب بين الدوالي معرشة بأنواعها وطيبة حلاوتها

عنب أخضر عنب أحمر عنب أسود بألوان العلم لونت حبتها

وقبل الصيف والحصرم إذا تقطف ورق من قبلما يخشن وبتخلل

لأكلة خضرا من ورق الدوالي بالشتا تشهيك ريحتها

ولمة عيلة عند الصوبة الخضرا بتشوي كستنا وتعيش قصتها

والزيتون

وزهر اللوز

والرمان

حتى الدفلا طلعت لابسة تيجانها الحمرا بزهوتها

وهاللزاب وطير خضيري غنى عن غصون السرو وظلتها

وللفقوس والبطيخ وخيارات عدروب السرو وقفت لبيعتها

.........

بحب السلط ودبكتها

ويا هالصوت لن ناديت كل جبالها تجاوب بهبتها

السلط ديرة عز